छलफल रामोस र म्याड्रिडबीच

छलफल रामोस र म्याड्रिडबीच

 कार्तिक २१ : स्पेनिस सेन्टर ब्याक तथा कप्तान सर्जियो रामोस र रियल म्याड्रिडबीच नयाँ सम्झौताको विषयमा छलफल भएको छ ।

रियलमा रामोसको सम्झौता अर्काे समरसँगै सकिनेछ । त्यसैले रामोसलाई फ्रि एजेन्टमार्फत अन्य क्लबले अनुबन्ध गर्न सक्नेछन् । रियलमा ३० वर्ष भन्दा माथिको खेलाडीलाई १ वर्ष मात्रै सम्झौता नविकरण गर्ने नीति छ । तर, क्लबका महत्त्वपुर्ण खेलाडी रहेका रामोसलाई रियलले २ वर्षको सम्झौता थप्ने तयारी गरेको छ ।

३४ वर्षीय रामो अझै पनि जिनेदिन जिदानको टोलीमा महत्त्वपुर्ण सदस्यस छन् । उनले बार्सिलोनाविरुद्धको एल क्लासिको र च्याम्पियन्स लिगमा इन्टर मिलानविरुद्धको खेलमा निर्णायक गोल गरेका थिए ।

इएसपिएनका अनुसार रियल रामोसको सम्झौता नविकरण गर्ने विषयमा सकरात्मक रहेको बुझिएको छ । इएसपिएनको दावी अनुसार यो समरमा रियल र रामोसको विषय टुगिंइसक्ने थियो । तर कोरोना महामारीका कारण यसले पुर्णता पाएन ।

कोरोना महामारीका कारण क्लबमा आर्थिक संकट हुने भएपछि क्लबले खेलाडी नै नकिन्ने र भएका केही खेलाडी बेच्ने निर्णय गर्दा रामोस र रियलबीचको छलफल अघि बढ्न सकेन । तर, यो दावी गरिएको छ कि रामोसका प्रतिनिधिले रामोस २०२४ सम्म क्लबमा रहन चाहेको बताएका छन् ।

त्यतिबेला उनको उमेर ३८ हुनेछ । यसको मतलब रामोसले रियलमा थप तीन वर्षको सम्झौता चाहेका छन् । रियल रामोससँग खुशी रहेपनि उनको सम्झौता कहिलेसम्म लम्बने यो स्पष्ट छैन ।

क्लबका अध्यक्ष फ्लोरेन्टिनो पेरेजले सिजनको शुरुमै रामोस म्याड्रिड छाडेर कतै नजानेमा विश्वस्त रहेको बताए । ‘रामोसले म्याड्रिडमा आफ्नो खेल करियर समाप्त गर्नेछन्,’ रियल म्याड्रिडले गत सिजनको ला लिगाको उपाधि जितेपछि भनेका थिए, ‘जबसम्म चाहन्छन् । तबसम्म यही रहनेछन् । । मलाई लाग्छ कि उनी हामीसँग धेरै वर्षसम्म रहनेछन् ।’

सेभिल्लाका पुर्व डिफेन्डर रामोसले २००५ मा रियलमा सामेल भएदेखि ६५० खेल खेलिसकेका छन् । उनले पाँचपटक ला लिगा र चारपटक च्याम्पियन्स लिग जितेका छन् । उनले रियलका १ सय गोल समेत पुरा गरेका छन् ।