डर्टमन्ड रोकियो,बायर्नको कठिन जित

डर्टमन्ड रोकियो,बायर्नको कठिन जित

आइतवार, आश्विन १२: जर्मन बुन्डेस लिगामा साविकको विजेता बायर्न म्युनिखले कठिन जित दर्ता गर्दा बोरुसिया डर्टमन्ड बराबरीमा रोकिएको छ । बायर्नले घरेलु टोली पाडेरबर्नलाई ३–२ ले पराजित गर्दा डर्टमन्ड वेर्डेर ब्रेमेनसँग २–२ गोलको बराबरीमा रोकिएको हो ।

निकै नै प्रतिस्पर्धात्मक खेलमा बायर्नको जितमा सर्जी जिनाब्री, फिलिपे कौटिन्हो र रोवर्ट लेवान्डोस्कीले गोल गरे । घरेलु टोलीका केइ प्रोगर र जमिलु कोलिन्सले गोल गरे ।

खेलको १५औं मिनेटमा सर्जी जिनाब्रीको गोलबाट बायर्न खेलमा अघि बढेको थियो । ५५औं मिनेटमा फिलिपे कौटिन्होले गोल गर्दै बायर्नको अग्रता दोब्बर पारे । ६८औं मिनेटमा केइ प्रोगरले गोल गर्दै घरेलु टोलीलाई खेलमा फर्काउने संकेत दिए । तर, ७९औं मिनेटमा रोवर्ट लेवान्डोस्कीले गोल गर्दै बायर्नलाई ३–२ को रोमाञ्चक जित दिलाए ।

जितसँगै बायर्न शीर्षस्थानमा उक्लिएको छ । बायर्नको ६ खेलबाट १४ अंक छ । दोस्रो स्थानको आरबी लेइप्लिजको १३ अंक छ । लेइप्लिज साल्केसँग ३–१ ले पराजित भएको थियो । पराजित पोडेरवर्न १ अंकसहित पुछारमा छ ।

अर्काे खेलमा बोरुसिया डर्टमन्डका मारियो गोट्जे र मार्काे रिउसले गोल गरे । वेर्डेर ब्रेमेनका मिलोट रासिचा र मार्काे फ्रेइडले गोल गरे ।
सातौ मिनेटमा ब्रेमेनले मिलोटको गोलबाट अग्रता लिएको थियो । नवौं मिनेटमा मारियो गोट्जेले बराबरी गोल फर्काए । ४१औं मिनेटमा मार्काे रिउसले गोल गर्दै घरेलु टोलीलाई पहिलो हाफमा २–१ को अग्रता दिलाए ।

५५औं मिनेटमा मार्काेले गोल गर्दै खेललाई २–२ गोलको बराबरीमा ल्याए । त्यसपछि थप गोल निस्कन नसक्दा खेल बराबरीमा सकियो ।
बराबरीसँगै डर्टमन्ड ११ अंक जोडेर सातौ स्थानमा रहँदा ब्रेमेन ७ अंकसहति १०औं स्थानमा छ ।