नेयमार आएको भए मेस्सी खुसी हुन्थें

नेयमार आएको भए मेस्सी खुसी हुन्थें

भाद्र २७: बार्सिलोनाका कप्तान लिओनेल मेस्सीले अघिल्लो साता बन्द भएको ट्रान्सफर विन्डोमा नेयमार बार्सिलोना आएको भए आफू निकै खुसी हुने बताएका छन् ।

मेस्सीले नेयमार टोलीमा आएको भए बार्सिलोनाको लक्ष्य प्राप्तिका लागि समेत निकै सहज हुने अभिव्यक्ति दिए । ‘नेयमार आएको भए म एकदम खुसी हुन्थें । जसरि नेयमारले पछिल्लो पटक क्लब छाडे, त्यसलाई लिएर केहि व्यक्ति दुखी हुनु जायज हो । तर खेलको हिसाबमा भन्ने हो भने नेयमार विश्वकै उत्कृष्ट खेलाडीमा पर्छन् । उनी टोलीमा हुँदा हाम्रो लक्ष्य प्राप्त गर्न थप सहज हुन्थ्यो,’ कप्तान मेस्सीले भने ।

नेयमारले सन् २०१३ मा बार्सिलोना आएपछि १ सय ८६ खेल खेल्दै १ सय ५ गोल गरेका थिए । सन् २०१७ मा विश्व कीर्तिमानी रकममा पीएसजी पुगेका उनले ५८ खेलमा ५१ गोल गरेका छन् । यस सिजनको सुरुवातमा बार्सिलोनाले नेयमारलाई भित्र्याउन निकै कसरत गरेको थियो । तर दुवै क्लब सम्झौतामा आउन नसक्दा उनको ट्रान्सफर सम्भव भएन ।

यद्यपि मेस्सीले बार्सिलोनाका खेलाडीले क्लबसमक्ष नेयमारलाई अनुबन्ध गर्न कुनै आग्रह नगरेको प्रष्ट पारे । ‘ हामीले नेयमारलाई अनुबन्ध गर्नुपर्छ भनेर क्लबलाई भनेका छैनौं । हामीले क्लबले सोधेको अवस्थामा उनी आएको खण्डमा हाम्रो स्थिति के हुन्छ भन्ने जानकारी गराएका हौँ । मैले थाहा पाएअनुसार क्लबले उनलाई अनुबन्ध गर्न औपचारिक प्रयास भने गरेको थियो,’ मेस्सीले थपे ।

मेस्सीले नेयमार टोलीमा नथपिएको अवस्थामा पनि बार्सिलोना बलियो टोली रहेको र आफू पनि अझै क्लबमा नै रहने बताए । उनी सन् २००१ मा बार्सिलोना आएका थिए । ‘ जबसम्म मेरो शरीरले साथ दिन्छ, म बार्सिलोनाबाट नै खेल्नेछु । यो मेरो घर हो । म जबसम्म क्लबको लागि खेल्न र जित सक्छु, कतै जाने छैन,’ मेस्सीले प्रष्ट पारे ।