भम्रण वर्षलाई केन्द्रित गरी चित्रकला प्रदर्शनी

भम्रण वर्षलाई केन्द्रित गरी चित्रकला प्रदर्शनी

काठमाडौँ, १५ फागुन : नेपाली कलालाई अन्तर्राष्ट्रियस्तरमा प्रवद्र्धन गरी भम्रण वर्षमा पर्यटकलाई आकर्षित गर्ने उद्देश्यले रुसी सांस्कृतिक केन्द्रमा मङ्गलबारदेखि सामूहिक चित्रकला प्रदर्शनी गरिएको छ । यही फागुन १८ गतेसम्म चल्ने प्रदर्शनीमा युनिक स्ट्रोक ग्रुपमा आबद्ध कलाकारले सिर्जना गरेका ३१ चित्रकला राखिएको छ । उक्त समूहमा प्राज्ञ सुष्मा राजभण्डारी, चन्दा श्रेष्ठ र रत्नकाजी शाक्य हुनुहुन्छ ।

वैदिक परम्परा तथा संस्कृतिले पारेको आध्यात्मिक प्रभावका कारण विकास भएको परम्परागत कला, त्यसको निर्माण शैलीले हाम्रा मौलिक कला विशिष्ट मानिएका छन् । त्यसैगरी हिन्दू, बौद्ध संस्कृतिमा आधारित मठमन्दिर, चैत्य निर्माणले काठमाडौँँ उपत्यका मन्दिरै मन्दिरको शहरका रूपमा विकास भएको यस क्षेत्रका विज्ञको भनाइ छ । भित्तेलेखन, पौभा चित्र, थाङ्का, मण्डला र पुरातन शैलीका कलाकृति हाम्रो धर्म, संस्कृति र आस्थासँग जोडिएका कला हुन् ।

नेपाल रसिया आर्ट क्लबले आयोजना गरेको उक्त प्रदर्शनीमा राखिएका चित्रमा मुलुकका विभिन्न स्थानका प्राकृतिक सौन्दर्य, सांस्कृतिक तथा धार्मिक पक्ष, सामाजिक जनजीवनका विभिन्न प्रभावलाई चित्रमार्फत देखाउन खोजिएको छ । गणेश, शिव, असनदेखि इन्द्रचोकसम्मको बस्ती, महिलाका सङ्घर्ष, चोभारको प्रकृतिलाई समेटिएका चित्रमा कलाकारले एक्रेलिकमा तेल रङ्गको प्रयोग गरेको पाइन्छ । त्यस्ता चित्रले प्रदर्शनीको रौनक थपेको छ । प्रदर्शनीमा सहभागी विभिन्न देशका कूटनीतिज्ञले स्वदेशी मौलिक कला, संस्कृतिको अवलोकन गरेका थिए ।

नेपाल ललितकला प्रज्ञा–प्रतिष्ठान (नाफा)का उपकुलपति गोपाल चित्रकारले स्वदेशी संस्कृति, प्रकृतिका साथै सामाजिक पक्षलाई अन्तर्राष्ट्रिय तहमा पु¥याउन सकेमा पर्यटन क्षेत्रमा सकारात्मक प्रभाव पर्ने विश्वास व्यक्त गर्नुभयो । उहाँले नाफाले स्थानीय तहमा कलाको विकासका लागि छिट्टै प्रदेशस्तरीय कार्यक्रम गर्न लागेको जानकारी दिनुभयो ।

क्लबका अध्यक्ष एवं प्राज्ञ राजभण्डारीले देशमा हुनलागेको भ्रमण वर्षलाई सफल बनाउन नेपाली कला, संस्कृतिको संरक्षण गर्नुपर्नेमा जोड दिँदै आगामी दिनमा ती चित्रलाई विभिन्न मुलुकमा प्रदर्शन गर्न जान लागेको जानकारी दिनुभयो । यसअघि सोही समूहले नेपाल कला परिषद्मा ती चित्रको प्रदर्शन गरेको क्लबले जनाएको छ ।

सङ्गठनको नाम परिवर्तन  

नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी निकट क्रान्तिकारी पत्रकार सङ्गठनले नाम परिवर्तन गरी अब जनपत्रकार सङ्गठन नेपाल राखेको छ ।

सबै जिल्ला र क्षेत्रीय समन्वय समितिलाई अब जनपत्रकार सङ्गठन, नेपालको नामबाट कार्यक्रम गर्न निर्देशन दिएको छ । यहाँ मङ्गलबार आयोजित पत्रकार सम्मेलनमा सङ्गठनका केन्द्रीय अध्यक्ष प्रकाश डुम्रेले गत पुस ७ र ८ गते बुटवलमा बसेको दोस्रो केन्द्रीय समितिको पूर्ण बैठकको निर्णय तथा पार्टीको सुझावअनुसार सङ्गठनको नाम परिवर्तन गरिएको जानकारी दिनुभयो ।

बैठकमा कानूनी र प्राविधिक कारणले सङ्गठनको नाम फेर्नका लागि सुझाव आएपछि निर्णय लिइएको उहाँले बताउँदै यसअघि क्रान्तिकारी पत्रकार सङ्गठनको नामबाट हुँदै आएका गतिविधि अब जनपत्रकार सङ्गठनको नामबाट हुने बताउनुभयो ।

प्रेसमैत्री ऐन तथा कानून निर्माणका लागि सङ्गठनले देशका विभिन्न ४० जिल्लामा मानवअधिकार, प्रेस तथा अभिव्यक्ति स्वतन्त्रताको बहस चलाएको जनाइएको छ । नेपाली पत्रकारिता अहिले जटिल र चुनौतीपूर्ण मोडमा आइपुगेकाले पत्रकारले पछिल्लो विकसित राजनीतिक घटनाक्रमलाई जिम्मेवार र संयमित भएर कलम चलाउन सङ्गठनले आग्रह गरेको छ ।