जनगणना अन्तरक्रिया

जनगणना अन्तरक्रिया

जनकपुरधाम, २० मङ्सिर: प्रदेश नं २ का भौतिक पूर्वाधार विकासमन्त्री जितेन्द्रप्रसाद सोनारले आगामी राष्ट्रिय जनगणना विविधतायुक्त हुनुपर्ने बताउनुभएको छ ।

आगामी राष्ट्रिय जनगणना २०७८ को तयारी सन्दर्भमा केन्द्रीय तथ्याङ्क विभाग र तथ्याङक कार्यालयद्वारा आज यहाँ आयोजित प्रदेशस्तरीय अन्तरक्रिया गोष्ठीमा मन्त्री सोनारले जनगणनाको प्रश्नावली सामाजिक विविधतायुक्त हुनुपर्दछ भन्नुभयो ।

सङ्घीयता अनुरूपको यथार्थ तथ्याङ्क सङ्कलन गर्नुपर्नेमा जोड दिँदै उहाँले यथार्थले ओतप्रोत तथ्याङ्क ऐना झैँ हुने र यसले समृृद्धिको यात्रालाई सघाउ पु¥याउने धारणा राख्नुभयो ।जातजाति, रोजगार, युवा पलायन, युवा, वृद्ध, प्रौढ, स्वास्थ्यचौकीमा पहुँच, धर्मान्तरण, भाषा, वन, अव्यवस्थित बसोबास, कृषिलगायत अवस्थाको तथ्याङ्क वास्तविकतामा आधारित हुनुपर्ने मन्त्री सोनारको भनाई थियो ।

केन्द्रीय तथ्याङ्क विभाागका निर्देशक ढुण्डीराज लामिछाने आगामी जनगणना राष्ट्रिय जनगणनाको तथ्याङ्क सङ्कलनमा पूर्ण गणना विधिको प्रयोग, घर तथा घरपरिवार सूचीकरण, व्यक्तिगत गणना र बहुनमूना दृष्टिकोण अपनाइने योजना रहेको जानकारी दिनुभयो ।अर्का निर्देशक शङ्करलाल श्रेष्ठ र धनुषा जिल्लाका तथ्याङ्क अधिकृत प्रवीणकुमार चौधरीले आगामी राष्ट्रिय जनगणना २०७८ को तथ्याङ्क सङ्कलनले एकीकृत तथ्याङ्क प्रणालीको विकासमा टेवा पु¥याउने धारणा राख्नुभयो ।