रु एक्काइस लाखको लागतमा विद्यालय भवन

school

फलेवास, पर्वत, २९ फागुन : करिव रु २१ लाखको लागतमा पर्वतको लिमिठाना माविमा दुईकोठे सुविधासम्पन्न विद्यालय भवन निर्माण भएको छ ।

विद्यालयमा भवनको आवश्यकतालाई मध्यनजर गर्दै स्थानीयस्तरमा विद्यालय तथा बालबालिकाको क्षेत्रमा काम गर्ने दातृ निकायको सहयोगमा उक्त भवन निर्माण सम्पन्न भएको हो ।

गुड नेवर्स इन्टरनेशनल नेपालको आर्थिक सहयोग तथा स्थानीय साझेदारी संस्था सोडेक नेपालको परिचालनमा भवन निर्माण सम्पन्न भएको हो । गुड नेवर्सको रु १८ लाख सहयोग र स्थानीयवासी तथा विद्यालयको रु तीन लाख जनश्रमदानबाट भवन निर्माण सम्पन्न भएको विद्यालयका प्रधानाध्यापक यामप्रसाद शर्माले जानकारी दिनुभयो ।

भवन निर्माणसँगै विद्यालयले प्रविधियुक्त शिक्षण सिकाइ क्रियाकलापसमेत सञ्चालन गर्ने लक्ष्य लिएको छ । सोसँगै विद्यालयले करिव ३० जना विद्यार्थीले एकैपटक पढ्न पाउने गरी कम्प्यूटर कक्षासँगै प्रोजेक्टरको माध्यमबाट पठनपाठन हुने गरी श्रव्यदृश्य सामग्रीसहितको स्मार्ट कक्षा सञ्चालन गर्न लागिएको प्रअ शर्माले जानकारी दिनुभयो ।

नवनिर्मित भवनको हालै एक समारोहका बीच प्रदेशसभा सदस्य सांसद विकास लम्सालले उद्घाटन गर्नुभएको थियो । कार्यक्रममा उहाँले शिक्षा नै समृद्धिको पहिलो जड भएको बताउँदै गुणस्तरीय शिक्षामा सबैले ध्यान दिनुपर्नेमा जोड दिनुभयो ।

पर्वतका विभिन्न नगरपालिका तथा गाउँपालिकाका छवटा वडामा विगत पाँच वर्षदेखि काम गर्दै आएको गुडनेवर्स इन्टरनेशनल नेपालले गत वर्षदेखि स्थानीय संस्था सोडेक नेपालको साझेदारीमा सोही क्षेत्रका २२ विद्यालय र एक हजार २०० विद्यार्थीमा कार्यक्रम सञ्चालन गर्दै आएको छ । यसै क्रममा गत वर्ष सन् २०१७ मा मात्रै भौतिक संरचनाअन्तर्गत तीनवटा विद्यालयमा भवन निर्माण गरी कुनै भवन हस्तान्तरण भइसकेका छन् भने कोही निर्माण सम्पन्न हुने चरणमा रहेको संस्थाका अध्यक्ष देवीप्रसाद तिमिल्सिनाले बताउनुभयो ।

सोसँगै गुड नेवर्सको सहयोगमा खानेपानी तथा सरसफाइ, बालबालिकाका अभिभावकलाई आयआर्जनलगायतका क्षेत्रमा समेत काम भइरहेको छ ।

उद्योग वाणिज्य संघको निर्वाचन चैत ३ मा

यसैबीच, पर्वत उद्योग वाणिज्य संघको आगामी चैत ३ गते हुने निर्वाचनमा नेतृत्वका लागि दुई पक्षिय प्रतिष्पर्धा हुने भएको छ ।

संघको नेतृत्वका लागि केदारनाथ शर्मा र लेखनाथ शर्माको समूहबीच प्रतिष्पर्धा हुने भएको हो । केदारनाथ शर्मा वर्तमान कार्यसमितिका वाणिज्य उपाध्यक्ष हुनुहुन्छ भने लेखनाथ शर्मा पूर्व प्रथम उपाध्यक्ष हुनुहुन्छ । केदारनाथलाई वाम गठबन्धनतर्फका व्यवसायीको समर्थन छ भने लेखनाथले लोकतान्त्रिक गठबन्धनबाट उम्मेदवारी दिनुभएको हो ।

अध्यक्षसहित २३ जना सदस्यका लागि हुने निर्वाचनमा दुवै समूहबाट गरी ५२ जनाको उम्मेदवारी परेको छ । सोमबार उम्मेदवारी दर्ताको समय तोकिएकोमा ५२ जनाको उम्मेदवारी परेको निर्वाचन अधिकृत डिल्लीराम शर्माले जानकारी दिनुभयो ।  (रासस)